ਚੰਡੀਗੜ੍ਹ:
ਕੇਂਦਰੀ ਗ੍ਰਹਿ ਮੰਤਰੀ ਅਮਿਤ ਸ਼ਾਹ ਅੱਜ ਸ਼ਨੀਵਾਰ ਸ਼ਾਮ ਨੂੰ ਚੰਡੀਗੜ੍ਹ ਪਹੁੰਚ ਰਹੇ ਹਨ। ਉਨ੍ਹਾਂ ਦੇ ਇਸ ਉੱਚ-ਪੱਧਰੀ ਦੌਰੇ ਨੂੰ ਲੈ ਕੇ ਪ੍ਰਸ਼ਾਸਨ ਅਤੇ ਚੰਡੀਗੜ੍ਹ ਪੁਲਿਸ ਵੱਲੋਂ ਸੁਰੱਖਿਆ ਦੇ ਕਰੜੇ ਇੰਤਜ਼ਾਮ ਕੀਤੇ ਗਏ ਹਨ। ਸ਼ਨੀਵਾਰ ਰਾਤ ਉਹ ਪੰਚਕੂਲਾ ਵਿਖੇ ਠਹਿਰਨਗੇ।
ਆਪਣੇ ਇਸ ਦੌਰੇ ਦੌਰਾਨ ਗ੍ਰਹਿ ਮੰਤਰੀ ਸ਼ਹਿਰ ਵਾਸੀਆਂ ਨੂੰ ਲਗਭਗ 258 ਕਰੋੜ ਰੁਪਏ ਦੇ ਵੱਖ-ਵੱਖ ਵਿਕਾਸ ਪ੍ਰੋਜੈਕਟਾਂ ਦਾ ਉਦਘਾਟਨ ਅਤੇ ਨੀਂਹ ਪੱਥਰ ਰੱਖ ਕੇ ਵੱਡੀ ਸੌਗਾਤ ਦੇਣਗੇ। ਇਹ ਮੁੱਖ ਸਮਾਗਮ ਸੈਕਟਰ 17 ਦੇ ਤਿਰੰਗਾ ਪਾਰਕ ਵਿਖੇ ਆਯੋਜਿਤ ਕੀਤਾ ਜਾਵੇਗਾ, ਜਿੱਥੇ ਉਹ 5,000 ਤੋਂ ਵੱਧ ਲੋਕਾਂ ਦੇ ਇਕੱਠ ਨੂੰ ਸੰਬੋਧਨ ਵੀ ਕਰਨਗੇ।
ਗ੍ਰਹਿ ਮੰਤਰੀ ਦਾ ਪੂਰਾ ਸ਼ਡਿਊਲ
-
31 ਅਕਤੂਬਰ (ਸ਼ਨੀਵਾਰ ਸ਼ਾਮ): ਚੰਡੀਗੜ੍ਹ ਪਹੁੰਚਣ ਤੋਂ ਬਾਅਦ ਰਾਤ ਦਾ ਠਹਿਰਾਅ ਪੰਚਕੂਲਾ ਵਿਖੇ ਹੋਵੇਗਾ।
-
1 ਨਵੰਬਰ (ਐਤਵਾਰ ਸਵੇਰੇ 10:20 ਵਜੇ): ਸੈਕਟਰ 26 ਸਥਿਤ ਪੁਲਿਸ ਲਾਈਨਜ਼ ਵਿਖੇ ਪਹੁੰਚ ਕੇ ਚੰਡੀਗੜ੍ਹ ਪੁਲਿਸ ਦੇ 'ਰਾਈਜ਼ਿੰਗ ਡੇ' ਸਮਾਰੋਹ ਵਿੱਚ ਮੁੱਖ ਮਹਿਮਾਨ ਵਜੋਂ ਸ਼ਿਰਕਤ ਕਰਨਗੇ।
-
1 ਨਵੰਬਰ (ਦੁਪਹਿਰ 1:45 ਵਜੇ): ਸੈਕਟਰ 17 ਦੇ ਤਿਰੰਗਾ ਪਾਰਕ ਪਹੁੰਚ ਕੇ ਵਿਕਾਸ ਪ੍ਰੋਜੈਕਟਾਂ ਦਾ ਉਦਘਾਟਨ/ਨੀਂਹ ਪੱਥਰ ਰੱਖਣਗੇ ਅਤੇ ਜਨਸਭਾ ਨੂੰ ਸੰਬੋਧਨ ਕਰਨਗੇ।
ਚੰਡੀਗੜ੍ਹ ਪੁਲਿਸ ਵੱਲੋਂ ਟ੍ਰੈਫਿਕ ਐਡਵਾਈਜ਼ਰੀ ਅਤੇ ਰੂਟ ਬਦਲਾਅ
ਗ੍ਰਹਿ ਮੰਤਰੀ ਦੀ ਸੁਰੱਖਿਆ ਅਤੇ ਆਵਾਜਾਈ ਸੁਚਾਰੂ ਰੱਖਣ ਲਈ ਚੰਡੀਗੜ੍ਹ ਟ੍ਰੈਫਿਕ ਪੁਲਿਸ ਨੇ ਵਿਸ਼ੇਸ਼ ਰੂਟ ਪਲਾਨ ਜਾਰੀ ਕੀਤਾ ਹੈ:
31 ਅਕਤੂਬਰ (ਰਾਤ 8:00 ਵਜੇ ਤੋਂ 9:00 ਵਜੇ ਤੱਕ):
ਇਸ ਸਮੇਂ ਦੌਰਾਨ ਹੇਠ ਲਿਖੇ ਮੁੱਖ ਰਸਤਿਆਂ 'ਤੇ ਆਵਾਜਾਈ ਪ੍ਰਭਾਵਿਤ ਰਹੇਗੀ:
-
ਸਾਊਥ ਰੋਡ: ਏਅਰਪੋਰਟ ਲਾਈਟ ਪੁਆਇੰਟ ਤੋਂ ਸੈਕਟਰ 31 ਚੌਂਕ ਤੱਕ।
-
ਈਸਟ ਰੋਡ: ਸੈਕਟਰ 31 ਚੌਂਕ ਤੋਂ ਟਰਾਂਸਪੋਰਟ ਲਾਈਟ ਪੁਆਇੰਟ ਤੱਕ।
-
ਮੱਧ ਮਾਰਗ: ਟਰਾਂਸਪੋਰਟ ਲਾਈਟ ਪੁਆਇੰਟ ਤੋਂ ਫਨ ਰਿਪਬਲਿਕ ਲਾਈਟ ਪੁਆਇੰਟ (ਪੰਚਕੂਲਾ ਵੱਲ ਜਾਣ ਵਾਲੇ ਰੂਟ) ਤੱਕ।
1 ਨਵੰਬਰ (ਸਵੇਰੇ 9:30 ਵਜੇ ਤੋਂ ਸ਼ਾਮ 4:00 ਵਜੇ ਤੱਕ):
-
ਮੱਧ ਮਾਰਗ: ਫਨ ਰਿਪਬਲਿਕ ਲਾਈਟ ਪੁਆਇੰਟ ਤੋਂ ਮਟਕਾ ਚੌਂਕ ਤੱਕ ਟ੍ਰੈਫਿਕ ਬੰਦ/ਡਾਇਵਰਟ ਰਹੇਗਾ।
-
ਸੈਕਟਰ 17 ਖੇਤਰ: ਸੈਕਟਰ 16/17 ਲਾਈਟ ਪੁਆਇੰਟ ਤੋਂ ਲਾਇਨਜ਼ ਲਾਈਟ ਪੁਆਇੰਟ ਰਾਹੀਂ ਤਿਰੰਗਾ ਪਾਰਕ ਤੱਕ ਵਾਹਨਾਂ ਦੀ ਆਵਾਜਾਈ 'ਤੇ ਮੁਕੰਮਲ ਰੋਕ ਰਹੇਗੀ।
ਸੈਕਟਰ 26 (ਪੁਲਿਸ ਲਾਈਨਜ਼) ਦੇ ਆਲੇ-ਦੁਆਲੇ ਵਿਸ਼ੇਸ਼ ਪਾਬੰਦੀਆਂ:
-
ਰੇਲਵੇ ਲਾਈਟ ਪੁਆਇੰਟ ਤੋਂ ਸ਼ਾਸਤਰੀ ਨਗਰ ਲਾਈਟ ਪੁਆਇੰਟ ਰਾਹੀਂ ਪੁਲਿਸ ਲਾਈਨਜ਼ ਦੇ ਪਿਛਲੇ ਹਿੱਸੇ ਤੱਕ ਆਵਾਜਾਈ ਨੂੰ ਕੰਟਰੋਲ ਕੀਤਾ ਜਾਵੇਗਾ।
-
ਪੁਲਿਸ ਲਾਈਨਜ਼ ਤੋਂ ਸੇਂਟ ਕਬੀਰ ਲਾਈਟ ਪੁਆਇੰਟ, ਕਿਸ਼ਨਗੜ੍ਹ ਰੋਡ ਮੋੜ, ਸੈਕਟਰ 5/6 ਅਤੇ 7/8 ਚੌਂਕ (ਹੀਰਾ ਸਿੰਘ ਚੌਂਕ), ਅਤੇ ਸੈਕਟਰ 7/8-18/19 ਚੌਂਕ (ਏ.ਪੀ. ਚੌਂਕ) ਤੱਕ ਵੀ ਰੂਟ ਪ੍ਰਭਾਵਿਤ ਰਹਿਣਗੇ।
-
ਈਸਟ ਰੋਡ 'ਤੇ ਟਰਾਂਸਪੋਰਟ ਲਾਈਟ ਪੁਆਇੰਟ ਤੋਂ ਸੈਕਟਰ 31 ਚੌਂਕ ਅਤੇ ਸਾਊਥ ਰੋਡ 'ਤੇ ਏਅਰਪੋਰਟ ਲਾਈਟ ਪੁਆਇੰਟ ਤੱਕ ਗੱਡੀਆਂ ਦੀ ਆਵਾਜਾਈ ਨੂੰ ਸੀਮਤ ਕੀਤਾ ਜਾਵੇਗਾ।
ਪੁਲਿਸ ਦੀ ਅਪੀਲ:
ਚੰਡੀਗੜ੍ਹ ਪੁਲਿਸ ਨੇ ਸ਼ਹਿਰ ਵਾਸੀਆਂ ਅਤੇ ਰਾਹਗੀਰਾਂ ਨੂੰ ਅਪੀਲ ਕੀਤੀ ਹੈ ਕਿ ਉਹ ਪਰੇਸ਼ਾਨੀ ਤੋਂ ਬਚਣ ਲਈ ਨਿਰਧਾਰਿਤ ਸਮੇਂ ਦੌਰਾਨ ਇਨ੍ਹਾਂ ਰੂਟਾਂ ਦੀ ਵਰਤੋਂ ਕਰਨ ਤੋਂ ਗੁਰੇਜ਼ ਕਰਨ ਅਤੇ ਵਿਕਲਪਿਕ (ਬਦਲਵੇਂ) ਰਸਤਿਆਂ ਦੀ ਚੋਣ ਕਰਨ
