.png)
ਬਾਲਾਸੋਰ:
ਓਡੀਸ਼ਾ ਦੇ ਬਾਲਾਸੋਰ ਜ਼ਿਲ੍ਹੇ ਦੇ ਜੰਗਲ ਵਿੱਚ ਮੰਗਲਵਾਰ ਸਵੇਰੇ 5 ਛੋਟੇ ਓਰੰਗੁਟਾਨ ਮਿਲਣ ਨਾਲ ਸਨਸਨੀ ਫੈਲ ਗਈ ਹੈ। ਇਹ ਦੁਰਲੱਭ ਜੀਵ ਭਾਰਤ ਵਿੱਚ ਕੁਦਰਤੀ ਤੌਰ 'ਤੇ ਨਹੀਂ ਪਾਏ ਜਾਂਦੇ, ਜਿਸ ਕਾਰਨ ਜੰਗਲਾਤ ਵਿਭਾਗ ਨੂੰ ਪੱਕਾ ਸ਼ੱਕ ਹੈ ਕਿ ਇਨ੍ਹਾਂ ਨੂੰ ਗੈਰ-ਕਾਨੂੰਨੀ ਢੰਗ ਨਾਲ ਤਸਕਰੀ ਕਰਕੇ ਇੱਥੇ ਲਿਆਂਦਾ ਗਿਆ ਸੀ।
ਜੰਗਲਾਤ ਅਧਿਕਾਰੀ ਪ੍ਰਤੀਕ ਪ੍ਰਕਾਸ਼ ਇੰਦਲਕਰ ਮੁਤਾਬਕ, ਬਰਾਮਦ ਕੀਤੇ ਗਏ ਓਰੰਗੁਟਾਨਾਂ ਵਿੱਚ 3 ਨਰ ਅਤੇ 2 ਮਾਦਾ ਬੱਚੇ ਸ਼ਾਮਲ ਹਨ, ਜਿਨ੍ਹਾਂ ਦੀ ਉਮਰ 6 ਮਹੀਨੇ ਤੋਂ 1 ਸਾਲ ਦੇ ਵਿਚਕਾਰ ਹੈ। ਫਿਲਹਾਲ ਇਨ੍ਹਾਂ ਨੂੰ ਭੁਵਨੇਸ਼ਵਰ ਦੇ ਨੰਦਨਕਾਨਨ ਚਿੜੀਆਘਰ ਵਿੱਚ ਰੱਖਿਆ ਗਿਆ ਹੈ। ਚਾਰ ਬੱਚੇ ਤੰਦਰੁਸਤ ਹਨ, ਜਦਕਿ ਡੀਹਾਈਡ੍ਰੇਸ਼ਨ ਦਾ ਸ਼ਿਕਾਰ ਪੰਜਵੇਂ ਬੱਚੇ ਦੀ ਹਾਲਤ 'ਤੇ ਡਾਕਟਰਾਂ ਵੱਲੋਂ ਨਜ਼ਰ ਰੱਖੀ ਜਾ ਰਹੀ ਹੈ।
ਮਾਂ ਨੂੰ ਮਾਰ ਕੇ ਖੋਹੇ ਗਏ ਬੱਚੇ
ਖੇਤਰੀ ਮੁੱਖ ਜੰਗਲਾਤ ਰੱਖਿਅਕ ਪ੍ਰਕਾਸ਼ ਚੰਦ ਗੋਗੀਨੇਨੀ ਨੇ ਦੱਸਿਆ ਕਿ ਮਾਦਾ ਓਰੰਗੁਟਾਨ 7-8 ਸਾਲ ਦੀ ਉਮਰ ਤੱਕ ਆਪਣੇ ਬੱਚਿਆਂ ਨੂੰ ਇਕੱਲਾ ਨਹੀਂ ਛੱਡਦੀ। ਤਸਕਰ ਇਨ੍ਹਾਂ ਨੰਨ੍ਹੇ ਜੀਵਾਂ ਨੂੰ ਫੜਨ ਲਈ ਜੰਗਲ ਵਿੱਚ ਉਨ੍ਹਾਂ ਦੀ ਮਾਂ ਨੂੰ ਬੇਰਹਿਮੀ ਨਾਲ ਮਾਰ ਦਿੰਦੇ ਹਨ। ਮਾਂ ਤੋਂ ਬਿਨਾਂ ਇਨ੍ਹਾਂ ਛੋਟੇ ਬੱਚਿਆਂ ਨੂੰ ਸੰਭਾਲਣਾ ਪ੍ਰਸ਼ਾਸਨ ਲਈ ਇੱਕ ਵੱਡੀ ਚੁਣੌਤੀ ਹੈ।
ਚੈਕਿੰਗ ਦੇ ਡਰੋਂ ਜੰਗਲ 'ਚ ਛੱਡ ਕੇ ਭੱਜੇ ਤਸਕਰ
ਓਰੰਗੁਟਾਨ ਮੁੱਖ ਤੌਰ 'ਤੇ ਇੰਡੋਨੇਸ਼ੀਆ, ਮਲੇਸ਼ੀਆ, ਬੋਰਨੀਓ ਅਤੇ ਸੁਮਾਤਰਾ ਵਿੱਚ ਪਾਏ ਜਾਂਦੇ ਹਨ। ਖ਼ਦਸ਼ਾ ਹੈ ਕਿ ਤਸਕਰ ਸਮੁੰਦਰੀ ਰਸਤੇ ਜਾਂ ਉੱਤਰ-ਪੂਰਬੀ ਕਾਰੀਡੋਰ ਰਾਹੀਂ ਇਨ੍ਹਾਂ ਨੂੰ ਭਾਰਤ ਲੈ ਕੇ ਆਏ। ਬਾਲਾਸੋਰ ਦੀ ਹੱਦ ਪੱਛਮੀ ਬੰਗਾਲ ਨਾਲ ਲੱਗਦੀ ਹੈ, ਇਸ ਲਈ ਸ਼ੱਕ ਹੈ ਕਿ ਤਸਕਰ ਸੜਕ ਰਸਤੇ ਇਨ੍ਹਾਂ ਨੂੰ ਲਿਜਾ ਰਹੇ ਸਨ ਅਤੇ ਪੁਲਿਸ ਚੈਕਿੰਗ ਦੇ ਡਰ ਕਾਰਨ ਜੰਗਲ ਵਿੱਚ ਛੱਡ ਕੇ ਫ਼ਰਾਰ ਹੋ ਗਏ। ਸੀਸੀਟੀਵੀ ਵਿੱਚ ਇੱਕ ਸ਼ੱਕੀ ਕਾਲੀ ਐੱਸਯੂਵੀ (SUV) ਵੀ ਕੈਦ ਹੋਈ ਹੈ।
.png)
ਪ੍ਰਾਈਵੇਟ ਚਿੜੀਆਘਰਾਂ ਦਾ ਸ਼ੌਕ ਬਣਿਆ ਵਜ੍ਹਾ
ਅਮੀਰਾਂ ਵੱਲੋਂ ਆਪਣੇ ਫਾਰਮਹਾਊਸਾਂ ਵਿੱਚ ਪ੍ਰਾਈਵੇਟ ਚਿੜੀਆਘਰ ਬਣਾਉਣ ਅਤੇ ਸਟੇਟਸ ਸਿੰਬਲ ਵਜੋਂ ਰੱਖਣ ਲਈ ਅਜਿਹੇ ਦੁਰਲੱਭ ਜੀਵਾਂ ਦੀ ਵੱਡੀ ਮੰਗ ਰਹਿੰਦੀ ਹੈ। ਫਿਲਹਾਲ ਪੁਲਿਸ ਦੀ ਐੱਸਟੀਐੱਫ (STF) ਅਤੇ ਵਾਈਲਡਲਾਈਫ ਕ੍ਰਾਈਮ ਕੰਟਰੋਲ ਬਿਊਰੋ (WCCB) ਵੱਲੋਂ ਮਾਮਲੇ ਦੀ ਸਾਂਝੀ ਜਾਂਚ ਕੀਤੀ ਜਾ ਰਹੀ ਹੈ।
