2.png)
ਜੇਕਰ ਤੁਸੀਂ ਵੀ ਦਿਨ ਭਰ ਆਉਣ ਵਾਲੀਆਂ ਅਣਜਾਣ ਅਤੇ ਸਪੈਮ ਕਾਲਾਂ ਤੋਂ ਪਰੇਸ਼ਾਨ ਹੋ, ਤਾਂ ਤੁਹਾਡੇ ਲਈ ਵੱਡੀ ਰਾਹਤ ਵਾਲੀ ਖ਼ਬਰ ਹੈ। 1 ਨਵੰਬਰ ਤੋਂ ਦੇਸ਼ ਭਰ ਵਿੱਚ ਮੋਬਾਈਲ ਕਾਲਿੰਗ ਨਾਲ ਸਬੰਧਤ ਇੱਕ ਅਹਿਮ ਨਿਯਮ ਲਾਗੂ ਹੋਣ ਜਾ ਰਿਹਾ ਹੈ। ਦੂਰਸੰਚਾਰ ਵਿਭਾਗ (DoT) ਨੇ ਰਿਲਾਇੰਸ ਜੀਓ, ਏਅਰਟੈੱਲ, ਵੋਡਾਫੋਨ-ਆਈਡੀਆ ਅਤੇ ਬੀਐਸਐਨਐਲ ਸਮੇਤ ਸਾਰੀਆਂ ਟੈਲੀਕਾਮ ਕੰਪਨੀਆਂ ਨੂੰ ਕਾਲਿੰਗ ਨੇਮ ਪ੍ਰੈਜ਼ੈਂਟੇਸ਼ਨ (CNAP) ਸਿਸਟਮ ਲਾਗੂ ਕਰਨ ਦੇ ਨਿਰਦੇਸ਼ ਦਿੱਤੇ ਹਨ।
CNAP ਸੇਵਾ ਕੀ ਹੈ ਅਤੇ ਇਹ ਕਿਵੇਂ ਕੰਮ ਕਰੇਗੀ?
ਕਾਲਿੰਗ ਨੇਮ ਪ੍ਰੈਜ਼ੈਂਟੇਸ਼ਨ (CNAP) ਇੱਕ ਅਜਿਹੀ ਤਕਨੀਕੀ ਸੁਵਿਧਾ ਹੈ, ਜਿਸ ਤਹਿਤ ਫ਼ੋਨ ਦੀ ਘੰਟੀ ਵੱਜਣ ਵੇਲੇ ਹੀ ਕਾਲ ਕਰਨ ਵਾਲੇ ਵਿਅਕਤੀ ਦਾ ਅਸਲ ਨਾਂ ਤੁਹਾਡੀ ਮੋਬਾਈਲ ਸਕਰੀਨ ’ਤੇ ਦਿਖਾਈ ਦੇਵੇਗਾ। ਇਸ ਸੇਵਾ ਲਈ ਕਿਸੇ ਥਰਡ-ਪਾਰਟੀ ਐਪ (ਜਿਵੇਂ ਟਰੂ-ਕਾਲਰ) ਦੀ ਲੋੜ ਨਹੀਂ ਪਵੇਗੀ।
ਟੈਲੀਕਾਮ ਕੰਪਨੀਆਂ ਸਾਰੇ ਗਾਹਕਾਂ ਦੇ ਨਾਵਾਂ ਅਤੇ ਨੰਬਰਾਂ ਦਾ ਇੱਕ ਕੇਂਦਰੀ ਡਾਟਾਬੇਸ ਤਿਆਰ ਕਰਨਗੀਆਂ। ਜਦੋਂ ਕੋਈ ਵਿਅਕਤੀ ਕਾਲ ਕਰੇਗਾ, ਤਾਂ ਸਿਮ ਖ਼ਰੀਦਣ ਸਮੇਂ ਕੇਵਾਈਸੀ (KYC) ਦਸਤਾਵੇਜ਼ਾਂ ਵਿੱਚ ਦਰਜ ਕੀਤਾ ਗਿਆ ਅਧਿਕਾਰਤ ਨਾਂ ਸਿੱਧਾ ਰਿਸੀਵਰ ਦੀ ਸਕਰੀਨ ’ਤੇ ਫਲੈਸ਼ ਹੋ ਜਾਵੇਗਾ।
ਫ਼ੋਨ ਦੀ ਸਕਰੀਨ ’ਤੇ ਕਿਹੜਾ ਨਾਂ ਦਿਖਾਈ ਦੇਵੇਗਾ?
CNAP ਸੇਵਾ ਅਧੀਨ ਨਾਂ ਪ੍ਰਦਰਸ਼ਿਤ ਕਰਨ ਲਈ ਕੁਝ ਮੁੱਖ ਨਿਯਮ ਤੈਅ ਕੀਤੇ ਗਏ ਹਨ:
-
ਸੇਵ ਕੀਤਾ ਨੰਬਰ: ਜੇਕਰ ਕਾਲਰ ਦਾ ਨੰਬਰ ਤੁਹਾਡੀ ਸੰਪਰਕ ਸੂਚੀ (Contact List) ਵਿੱਚ ਪਹਿਲਾਂ ਤੋਂ ਸੇਵ ਹੈ, ਤਾਂ ਤੁਹਾਡੇ ਵੱਲੋਂ ਰੱਖਿਆ ਨਾਂ ਹੀ ਦਿਖੇਗਾ।
-
ਅਣਜਾਣ ਨੰਬਰ: ਜੇਕਰ ਨੰਬਰ ਸੇਵ ਨਹੀਂ ਹੈ, ਤਾਂ ਸਿਮ ਕਾਰਡ ਲੈਂਦੇ ਸਮੇਂ ਸਰਕਾਰੀ ਪਛਾਣ-ਪੱਤਰ ਅਨੁਸਾਰ ਦਰਜ ਕਰਵਾਇਆ ਗਿਆ ਨਾਂ ਸਕਰੀਨ ’ਤੇ ਆਵੇਗਾ।
-
ਵਿਦੇਸ਼ੀ ਕਾਲਾਂ: ਵਿਦੇਸ਼ ਤੋਂ ਆਉਣ ਵਾਲੀਆਂ ਕਾਲਾਂ ਉੱਤੇ ਕਿਸੇ ਵਿਅਕਤੀ ਦੇ ਨਾਂ ਦੀ ਥਾਂ ਸਪੱਸ਼ਟ ਰੂਪ ਵਿੱਚ ‘International Call’ ਲਿਖਿਆ ਨਜ਼ਰ ਆਵੇਗਾ।
-
ਕਾਰੋਬਾਰੀ ਨੰਬਰ (Business Calls): ਪ੍ਰਮਾਣਿਤ ਵਪਾਰਕ ਅਦਾਰੇ ਅਤੇ ਕੰਪਨੀਆਂ ਆਪਣੇ ਰਜਿਸਟਰਡ ਬਿਜ਼ਨੈੱਸ ਨੇਮ ਜਾਂ ਟ੍ਰੇਡਮਾਰਕ ਨੂੰ ਦਿਖਾਉਣ ਦੀ ਸਹੂਲਤ ਲੈ ਸਕਣਗੀਆਂ।
2.png)
ਯੂਜ਼ਰ ਪ੍ਰਾਈਵੇਸੀ ਦਾ ਕਿਵੇਂ ਰੱਖਿਆ ਜਾਵੇਗਾ ਧਿਆਨ?
ਟੈਲੀਕਾਮ ਕੰਪਨੀਆਂ ਮੁਤਾਬਕ ਯੂਜ਼ਰਾਂ ਦੀ ਨਿੱਜਤਾ ਦਾ ਪੂਰਾ ਖ਼ਿਆਲ ਰੱਖਿਆ ਗਿਆ ਹੈ:
-
ਕਾਲ ਖ਼ਤਮ ਹੁੰਦੇ ਹੀ ਸਿਸਟਮ ਦੀ ਅਸਥਾਈ ਮੈਮੋਰੀ ਵਿੱਚੋਂ ਦਿਖਾਇਆ ਗਿਆ ਨਾਂ ਤੁਰੰਤ ਹਟਾ ਦਿੱਤਾ ਜਾਵੇਗਾ।
-
ਜਿਨ੍ਹਾਂ ਗਾਹਕਾਂ ਨੇ ਆਪਣੀ ਪਛਾਣ ਗੁਪਤ ਰੱਖਣ ਲਈ CLIR (Calling Line Identification Restriction) ਸੇਵਾ ਸਰਗਰਮ ਕਰਵਾਈ ਹੋਵੇਗੀ, ਉਨ੍ਹਾਂ ਦਾ ਨਾਂ ਸਕਰੀਨ ’ਤੇ ਪ੍ਰਦਰਸ਼ਿਤ ਨਹੀਂ ਹੋਵੇਗਾ।
ਇਸ ਨਵੇਂ ਕਦਮ ਨਾਲ ਸਾਈਬਰ ਠੱਗੀਆਂ, ਫਰਜ਼ੀ ਕਾਲਾਂ ਅਤੇ ਸਪੈਮ ਮੈਸੇਜਾਂ/ਕਾਲਾਂ ’ਤੇ ਵੱਡੀ ਠੱਲ੍ਹ ਪੈਣ ਦੀ ਉਮੀਦ ਹੈ।
2.png)
2.png)
