ਰਾਹੁਲ ਗਾਂਧੀ ਦੇ ਚਾਰਟਰਡ ਜਹਾਜ਼ ਨੂੰ ਵਾਰਾਣਸੀ ‘ਚ ਉਤਰਨ ਤੋਂ ਰੋਕਿਆ, ਪ੍ਰਯਾਗਰਾਜ ਦੌਰਾ ਰੱਦ

ਕਾਂਗਰਸ ਦੇ ਸਾਬਕਾ ਰਾਸ਼ਟਰੀ ਪ੍ਰਧਾਨ ਰਾਹੁਲ ਗਾਂਧੀ ਦਾ ਪ੍ਰਯਾਗਰਾਜ ਦੌਰਾ ਰੱਦ ਕਰ ਦਿੱਤਾ ਗਿਆ ਹੈ। ਉਹ ਕੇਰਲ ਦੇ ਆਪਣੇ ਸੰਸਦੀ ਖੇਤਰ ਵਾਇਨਾਡ ਤੋਂ ਸੋਮਵਾਰ ਰਾਤ ਨੂੰ ਪ੍ਰਯਾਗਰਾਜ ਆਉਣ ਵਾਲੇ ਸਨ। ਉਨ੍ਹਾਂ ਨੇ ਰਾਤ 10.30 ਵਜੇ ਵਾਰਾਣਸੀ ਦੇ ਲਾਲ ਬਹਾਦੁਰ ਸ਼ਾਸਤਰੀ ਹਵਾਈ ਅੱਡੇ ‘ਤੇ ਪਹੁੰਚਣਾ ਸੀ। ਉਥੋਂ ਸੜਕ ਰਾਹੀਂ ਪ੍ਰਯਾਗਰਾਜ ਆਉਣ ਦਾ ਪ੍ਰੋਗਰਾਮ ਤੈਅ ਹੋਇਆ ਸੀ ਪਰ ਉਹ ਵਾਇਨਾਡ ਤੋਂ ਸਿੱਧੇ ਦਿੱਲੀ ਚਲੇ ਗਏ।

ਰਾਹੁਲ ਨਿੱਜੀ ਦੌਰੇ ‘ਤੇ ਪ੍ਰਯਾਗਰਾਜ ਆ ਰਹੇ ਸਨ। ਉਸ ਨੇ ਕਮਲਾ ਨਹਿਰੂ ਟਰੱਸਟ ਦੇ ਪ੍ਰੋਗਰਾਮ ਵਿਚ ਜਾਣਾ ਸੀ। ਰਾਹੁਲ ਦੇ ਦੌਰੇ ਦੀ ਸੂਚਨਾ ਮਿਲਣ ‘ਤੇ ਸੋਮਵਾਰ ਸ਼ਾਮ ਸਵਰਾਜ ਭਵਨ, ਆਨੰਦ ਭਵਨ ਅਤੇ ਕਮਲਾ ਨਹਿਰੂ ਹਸਪਤਾਲ ‘ਚ ਪੁਲਸ ਮੁਲਾਜ਼ਮਾਂ ਦੀ ਡਿਊਟੀ ਲਗਾ ਦਿੱਤੀ ਗਈ।

ਸਵਰਾਜ ਭਵਨ ਵਿਖੇ ਰਾਤ ਨੂੰ ਆਰਾਮ ਕਰਨ ਤੋਂ ਬਾਅਦ ਮੰਗਲਵਾਰ ਸਵੇਰੇ 9.30 ਵਜੇ ਸਵਰਾਜ ਭਵਨ ਵਿਖੇ ਕਮਲਾ ਨਹਿਰੂ ਹਸਪਤਾਲ ਦੇ ਮੁੱਖ ਕਾਰਜਕਾਰੀ ਅਧਿਕਾਰੀ ਡਾ: ਮਧੂ ਚੰਦਰਾ, ਸੀਨੀਅਰ ਸਲਾਹਕਾਰ ਪਦਮ ਸ਼੍ਰੀ ਡਾ: ਬੀ. ਪਾਲ ਅਤੇ ਹੋਰ ਡਾਕਟਰਾਂ ਨਾਲ ਚਾਹ ‘ਤੇ ਚਰਚਾ ਹੋਣੀ ਸੀ। ਇਸ ਤੋਂ ਬਾਅਦ ਬਾਅਦ ਦੁਪਹਿਰ ਉਹ ਕਮਲਾ ਨਹਿਰੂ ਹਸਪਤਾਲ ਵਿਖੇ ਅਤਿ-ਆਧੁਨਿਕ ਰੇਡੀਏਸ਼ਨ ਮਸ਼ੀਨ ਲੀਨੀਅਰ ਐਕਸਲੇਟਰ ਦਾ ਉਦਘਾਟਨ ਕਰਨ ਵਾਲੇ ਸਨ।

ਕਾਂਗਰਸ ਦੇ ਪ੍ਰਯਾਗਰਾਜ ਸੂਬੇ ਦੇ ਪ੍ਰਧਾਨ ਅਜੈ ਰਾਏ ਮੁਤਾਬਕ ਰਾਹੁਲ ਗਾਂਧੀ ਦਾ ਦੌਰਾ ਸੁਰੱਖਿਆ ਕਾਰਨਾਂ ਕਰਕੇ ਰੱਦ ਕਰ ਦਿੱਤਾ ਗਿਆ ਹੈ। ਹੁਣ ਉਹ ਇੱਕ-ਦੋ ਦਿਨਾਂ ਵਿੱਚ ਦਿੱਲੀ ਤੋਂ ਸਿੱਧੇ ਪ੍ਰਯਾਗਰਾਜ ਆਉਣਗੇ।