ਸਾਵਧਾਨ! ਤੁਹਾਡੀ ਜੇਬ 'ਚ ਪਿਆ ਨੋਟ ਕਿਤੇ ਨਕਲੀ ਤਾਂ ਨਹੀਂ? ਕੈਮਰੇ 'ਤੇ ਖੁੱਲ੍ਹਿਆ ਉਹ ਰਾਜ਼ ਜਿਸ ਨੇ RBI ਅਤੇ ਬੈਂਕਾਂ ਦੇ ਉਡਾ ਦਿੱਤੇ ਹੋਸ਼

ਕੀ ਤੁਹਾਡੇ ਪਰਸ ਵਿੱਚ ਪਏ ਹੋਏ ਨੋਟ ਅਸਲੀ ਹਨ? ਇਹ ਸਵਾਲ ਇਸ ਲਈ ਖੜ੍ਹਾ ਹੋਇਆ ਹੈ ਕਿਉਂਕਿ ਪਹਿਲੀ ਵਾਰ ਕੈਮਰੇ 'ਤੇ ਨਕਲੀ ਨੋਟ ਸਪਲਾਈ ਕਰਨ ਵਾਲੇ ਇੱਕ ਅਜਿਹੇ ਗੈਂਗ ਦੇ ਚਿਹਰੇ ਸਾਹਮਣੇ ਆਏ ਹਨ, ਜਿਨ੍ਹਾਂ ਦੇ ਦਾਅਵੇ ਸੁਣ ਕੇ ਬੈਂਕਾਂ ਅਤੇ ਆਰ.ਬੀ.ਆਈ. (RBI) ਦੇ ਹੋਸ਼ ਉੱਡ ਜਾਣਗੇ। ਇੰਸਟਾਗ੍ਰਾਮ ਦੀ ਇੱਕ ਰੀਲ (Instagram Reel) ਤੋਂ ਸ਼ੁਰੂ ਹੋਈ ਜਾਂਚ ਪੱਤਰਕਾਰਾਂ ਦੀ ਟੀਮ ਨੂੰ ਨਕਲੀ ਨੋਟਾਂ ਦੇ ਉਸ ਵੱਡੇ ਸਿੰਡੀਕੇਟ ਤੱਕ ਲੈ ਗਈ, ਜੋ ਸੋਸ਼ਲ ਮੀਡੀਆ 'ਤੇ ਨੋਟ ਗਿਣਨ ਵਾਲੀ ਮਸ਼ੀਨ ਵਿੱਚ ਨਕਲੀ ਨੋਟ ਪਾ ਕੇ ਦਾਅਵਾ ਕਰਦੇ ਹਨ ਕਿ ਇਨ੍ਹਾਂ ਨੋਟਾਂ ਨੂੰ ਨਾ ਤਾਂ ਕੋਈ ਮਸ਼ੀਨ ਫੜ ਸਕਦੀ ਹੈ ਅਤੇ ਨਾ ਹੀ ਕੋਈ ATM।

ਇੰਸਟਾਗ੍ਰਾਮ ਰੀਲ 'ਤੇ ਦਿੱਤੇ ਨੰਬਰ ਤੋਂ ਇੰਝ ਸ਼ੁਰੂ ਹੋਈ 'ਡੀਲ'

ਗੈਂਗ ਨੇ ਇੰਸਟਾਗ੍ਰਾਮ ਰੀਲ ਵਿੱਚ ਆਪਣੇ ਮੋਬਾਈਲ ਨੰਬਰ ਪਾਏ ਹੋਏ ਸਨ। ਰਿਪੋਰਟਰ ਨੇ ਗਾਹਕ ਬਣ ਕੇ ਉਨ੍ਹਾਂ ਦੇ ਪਹਿਲੇ ਨੰਬਰ (722****572) 'ਤੇ ਮੈਸੇਜ ਕੀਤਾ ਅਤੇ ਪੁੱਛਿਆ- "ਕਿੰਨੇ ਪੈਸਿਆਂ ਦੇ ਬਦਲੇ ਕਿੰਨੇ ਨੋਟ ਮਿਲਣਗੇ?"

ਦੂਜੇ ਹੀ ਦਿਨ ਮਾਫੀਆ ਵੱਲੋਂ ਜਵਾਬ ਆਇਆ, "1 ਲੱਖ ਰੁਪਏ ਦੇ ਬਦਲੇ 10 ਲੱਖ ਰੁਪਏ ਦੇ ਨਕਲੀ ਨੋਟ ਮਿਲਣਗੇ। ਪੂਰੇ ਭਾਰਤ ਦੇ ਮਾਰਕੀਟ, ATM ਅਤੇ ਬੈਂਕ ਡਿਪਾਜ਼ਿਟ ਮਸ਼ੀਨਾਂ 'ਚ ਇਹ ਚੱਲਣਗੇ। ਫਸਟ ਕੁਆਲਿਟੀ ਦਾ ਪੇਪਰ ਹੋਵੇਗਾ। ਹੱਥੋ-ਹੱਥ ਮਾਲ ਲੈਣ ਲਈ ਮਹਾਰਾਸ਼ਟਰ ਦੇ ਅਕੋਲਾ ਆਉਣਾ ਪਵੇਗਾ ਅਤੇ 10 ਹਜ਼ਾਰ ਰੁਪਏ ਐਡਵਾਂਸ ਦੇਣੇ ਪੈਣਗੇ।"

ਜਦੋਂ   ਨਿੱਜੀ ਏਜੰਸੀ ਦੇ ਰਿਪੋਰਟਰ ਨੇ ਅਕੋਲਾ ਦੂਰ ਹੋਣ ਦੀ ਗੱਲ ਕਹੀ, ਤਾਂ ਨਕਲੀ ਨੋਟਾਂ ਦੇ ਮਾਫੀਆ ਨੇ ਉਸ ਨੂੰ ਰਾਜਸਥਾਨ ਦੇ ਅਲਵਰ ਬੱਸ ਸਟੈਂਡ 'ਤੇ ਕੈਸ਼ ਲੈ ਕੇ ਬੁਲਾ ਲਿਆ।

ਵੀਡੀਓ ਕਾਲ 'ਤੇ ਪਹਿਲਾਂ ਚੈੱਕ ਕੀਤਾ 'ਅਸਲੀ ਕੈਸ਼', ਫਿਰ ਰਿਪੋਰਟਰਾਂ ਦੀ ਲਈ ਫੋਟੋ

ਜਦੋਂ ਰਿਪੋਰਟਰ ਅਲਵਰ ਲਈ ਨਿਕਲਿਆ, ਤਾਂ ਮਾਫੀਆ ਨੇ ਵੀਡੀਓ ਕਾਲ ਕੀਤੀ। ਮਾਫੀਆ ਨੇ ਆਪਣਾ ਕੈਮਰਾ ਬੰਦ ਰੱਖਿਆ ਹੋਇਆ ਸੀ ਅਤੇ ਰਿਪੋਰਟਰ ਨੂੰ ਅਸਲੀ 1 ਲੱਖ ਰੁਪਏ ਦਾ ਬੰਡਲ ਦਿਖਾਉਣ ਲਈ ਕਿਹਾ। ਪੂਰੀ ਤਸੱਲੀ ਕਰਨ ਤੋਂ ਬਾਅਦ, ਮਾਫੀਆ ਨੇ ਰਿਪੋਰਟਰ ਦੀ ਫੋਟੋ ਖਿੱਚ ਲਈ ਤਾਂ ਜੋ ਉਹ ਆਪਣੇ ਗੁੰਡਿਆਂ ਨੂੰ ਭੇਜ ਸਕੇ।

ਇਸ ਤੋਂ ਬਾਅਦ ਗੈਂਗ ਦੇ ਦੂਜੇ ਮੈਂਬਰ ਨੇ (772****583) ਨੰਬਰ ਤੋਂ ਫੋਨ ਕੀਤਾ। ਰਿਪੋਰਟਰ ਨੇ ਉਸ ਨੂੰ ਸ਼ਰਤ ਰੱਖੀ, "ਮੈਂ ਪਹਿਲਾਂ ਸੈਂਪਲ ਚੈੱਕ ਕਰਾਂਗਾ, ATM ਵਿੱਚ ਜਮ੍ਹਾਂ ਕਰਵਾ ਕੇ ਦੇਖਾਂਗਾ, ਜੇਕਰ ਕੋਈ ਦਿੱਕਤ ਨਾ ਆਈ ਤਾਂ ਹੀ ਪੇਮੈਂਟ ਹੱਥ ਵਿੱਚ ਦਿਆਂਗਾ।" ਗੈਂਗ ਦੇ ਮੈਂਬਰ ਨੇ ਕਿਹਾ, "ਤੁਸੀਂ ਜਿਵੇਂ ਕਹੋਗੇ, ਉਵੇਂ ਹੀ ਚੈੱਕ ਕਰਵਾ ਦਿਆਂਗੇ, ਪਹਿਲਾਂ ਆਪਣੀ ਲੋਕੇਸ਼ਨ ਭੇਜੋ।"

40 ਮਿੰਟ ਤੱਕ ਰੱਖੀ ਨਜ਼ਰ, 3 ਸੈਂਪਲ ਦੇ ਕੇ ਪਿੱਛੇ ਲਗਾ ਲਈਆਂ ਗੱਡੀਆਂ

ਮੁਲਜ਼ਮਾਂ ਨੇ ਬੇਹੱਦ ਸ਼ਾਤਰ ਤਰੀਕੇ ਨਾਲ ਰਿਪੋਰਟਰਾਂ ਦੀ ਟੀਮ 'ਤੇ ਕਰੀਬ 40 ਮਿੰਟ ਤੱਕ ਲੁਕ ਕੇ ਨਜ਼ਰ ਰੱਖੀ। ਜਦੋਂ ਉਨ੍ਹਾਂ ਨੂੰ ਸਭ ਕੁਝ ਸਹੀ ਲੱਗਿਆ, ਤਾਂ ਉਨ੍ਹਾਂ ਨੇ ਰਿਪੋਰਟਰ ਨੂੰ ਨਕਲੀ ਨੋਟਾਂ ਦੇ 3 ਸੈਂਪਲ ਦਿੱਤੇ। ਜਦੋਂ ਰਿਪੋਰਟਰ ਦੀ ਟੀਮ ਨੇ ਇਹ ਕਹਿ ਕੇ ਡੀਲ ਟਾਲਣ ਦੀ ਕੋਸ਼ਿਸ਼ ਕੀਤੀ ਕਿ ਉਹ ਸੈਂਪਲ ਚੈੱਕ ਕਰਨ ਤੋਂ ਬਾਅਦ ਵੱਡੀ ਡੀਲ ਕਰਨਗੇ, ਤਾਂ ਗੈਂਗ ਨੂੰ ਸ਼ੱਕ ਹੋ ਗਿਆ।

ਇਸ ਤੋਂ ਬਾਅਦ ਬਦਮਾਸ਼ਾਂ ਨੇ ਕਈ ਬਾਈਕਾਂ ਅਤੇ ਕਾਰਾਂ ਰਾਹੀਂ ਰਿਪੋਰਟਰਾਂ ਦੀ ਗੱਡੀ ਦਾ ਪਿੱਛਾ ਕਰਨਾ ਸ਼ੁਰੂ ਕਰ ਦਿੱਤਾ। ਪੱਤਰਕਾਰਾਂ ਦੀ ਟੀਮ ਨੇ ਬੜੀ ਮੁਸ਼ਕਲ ਨਾਲ ਉੱਥੋਂ ਨਿਕਲ ਕੇ ਆਪਣੀ ਜਾਨ ਬਚਾਈ। ਇਸ ਸਟਿੰਗ ਓਪਰੇਸ਼ਨ ਨੇ ਸਾਫ਼ ਕਰ ਦਿੱਤਾ ਹੈ ਕਿ ਕਿਵੇਂ ਸੋਸ਼ਲ ਮੀਡੀਆ ਰਾਹੀਂ ਦੇਸ਼ ਦੀ ਅਰਥਵਿਵਸਥਾ ਨੂੰ ਖੋਖਲਾ ਕਰਨ ਵਾਲਾ ਇਹ ਨੈੱਟਵਰਕ ਆਮ ਲੋਕਾਂ ਦੇ ਪਰਸ ਤੱਕ ਨਕਲੀ ਨੋਟ ਪਹੁੰਚਾ ਰਿਹਾ ਹੈ।