.png)
ਮੇਰਠ (ਉੱਤਰ ਪ੍ਰਦੇਸ਼): ਉੱਤਰ ਪ੍ਰਦੇਸ਼ ਦੇ ਮੇਰਠ ਵਿੱਚ ਆਪਣੇ ਪ੍ਰੇਮੀ ਨਾਲ ਮਿਲ ਕੇ ਪਤੀ ਸੌਰਭ ਰਾਜਪੂਤ ਦਾ ਬੇਰਹਿਮੀ ਨਾਲ ਕਤਲ ਕਰਨ ਵਾਲੀ ਮੁਸਕਾਨ ਰਸਤੋਗੀ ਅਤੇ ਉਸ ਦੇ ਪ੍ਰੇਮੀ ਸਾਹਿਲ ਸ਼ੁਕਲਾ ਨੂੰ ਅਦਾਲਤ ਨੇ ਫਾਂਸੀ (ਮੌਤ) ਦੀ ਸਜ਼ਾ ਸੁਣਾਈ ਹੈ।
ਅਦਾਲਤ ਨੇ ਸਖ਼ਤ ਟਿੱਪਣੀ ਕਰਦਿਆਂ ਕਿਹਾ ਕਿ "ਅਧਰਮ ਦੇ ਕੰਮ 'ਤੇ ਸਜ਼ਾ ਦੇਣਾ ਹੀ ਧਰਮ ਹੁੰਦਾ ਹੈ। ਤੁਸੀਂ ਦੋਵਾਂ ਨੇ ਮਿਲ ਕੇ ਸੌਰਭ ਦਾ ਬੇਰਹਿਮੀ ਨਾਲ ਕਤਲ ਕੀਤਾ ਹੈ, ਇਸ ਲਈ ਕੋਈ ਮੁਆਫ਼ੀ ਸਵੀਕਾਰ ਨਹੀਂ ਹੋਵੇਗੀ।"
ਵੀਡੀਓ ਕਾਨਫਰੰਸਿੰਗ ਦੌਰਾਨ ਫੁੱਟ-ਫੁੱਟ ਕੇ ਰੋਏ ਦੋਸ਼ੀ
ਸਜ਼ਾ ਸੁਣਾਏ ਜਾਣ ਸਮੇਂ ਜੇਲ੍ਹ ਵਿੱਚ ਬੰਦ ਮੁਸਕਾਨ ਅਤੇ ਸਾਹਿਲ ਨੂੰ ਵੀਡੀਓ ਕਾਨਫਰੰਸਿੰਗ ਰਾਹੀਂ ਅਦਾਲਤ ਨਾਲ ਜੋੜਿਆ ਗਿਆ ਸੀ। ਫੈਸਲਾ ਸੁਣਦਿਆਂ ਹੀ ਦੋਵੇਂ ਫੁੱਟ-ਫੁੱਟ ਕੇ ਰੋਣ ਲੱਗ ਪਏ। ਜਦੋਂ ਜੱਜ ਨੇ ਮੁਸਕਾਨ ਤੋਂ ਪੁੱਛਿਆ ਕਿ ਉਸ ਨੂੰ ਆਪਣੇ ਪਤੀ ਦੇ ਕਤਲ ਦੇ ਦੋਸ਼ ਵਿੱਚ ਕੀ ਸਜ਼ਾ ਚਾਹੀਦੀ ਹੈ, ਤਾਂ ਉਸ ਨੇ ਕਿਹਾ— "ਮੇਰੀਆਂ ਬੱਚੀਆਂ ਦਾ ਖ਼ਿਆਲ ਰੱਖਿਆ ਜਾਵੇ।" ਇਸ ਤੋਂ ਬਾਅਦ ਜਦੋਂ ਸਾਹਿਲ ਤੋਂ ਪੁੱਛਿਆ ਗਿਆ ਤਾਂ ਉਹ ਬਿਲਕੁਲ ਚੁੱਪ ਰਿਹਾ।
ਅਦਾਲਤ ਦੇ ਇਸ ਫੈਸਲੇ ਤੋਂ ਬਾਅਦ ਸੌਰਭ ਦੀ ਬਜ਼ੁਰਗ ਮਾਂ ਭਾਵੁਕ ਹੋ ਗਈ ਅਤੇ ਰੋਂਦਿਆਂ ਕਿਹਾ ਕਿ ਅਖ਼ੀਰ ਉਨ੍ਹਾਂ ਨੂੰ ਸ਼ਾਂਤੀ ਨਾਲ ਇਨਸਾਫ਼ ਮਿਲ ਗਿਆ ਹੈ।
ਲਾਸ਼ ਦੇ 5 ਟੁਕੜੇ ਕਰਕੇ ਨੀਲੇ ਡਰੱਮ 'ਚ ਭਰਿਆ ਸੀ ਸੀਮਿੰਟ
ਇਹ ਖ਼ੌਫ਼ਨਾਕ ਵਾਰਦਾਤ 3 ਮਾਰਚ 2025 ਨੂੰ ਵਾਪਰੀ ਸੀ। ਮੁਸਕਾਨ ਅਤੇ ਸਾਹਿਲ ਨੇ ਸੌਰਭ ਦੀ ਹੱਤਿਆ ਕਰਨ ਤੋਂ ਬਾਅਦ ਸਬੂਤ ਮਿਟਾਉਣ ਲਈ ਉਸ ਦੀ ਲਾਸ਼ ਦੇ 5 ਟੁਕੜੇ ਕਰ ਦਿੱਤੇ ਸਨ। ਇਨ੍ਹਾਂ ਟੁਕੜਿਆਂ ਨੂੰ ਇੱਕ ਨੀਲੇ ਰੰਗ ਦੇ ਡਰੱਮ ਵਿੱਚ ਪਾ ਕੇ ਉੱਪਰੋਂ ਸੀਮਿੰਟ ਦਾ ਘੋਲ ਪਾ ਦਿੱਤਾ ਗਿਆ ਸੀ ਤਾਂ ਜੋ ਕਿਸੇ ਨੂੰ ਕੋਈ ਬਦਬੂ ਜਾਂ ਸ਼ੱਕ ਨਾ ਹੋਵੇ।
ਮੇਰਠ ਦੇ ਐੱਸਐੱਸਪੀ ਬੀਬੀਜੀਟੀਐੱਸ ਮੂਰਤੀ ਅਨੁਸਾਰ ਪੁਲਿਸ ਅਤੇ ਸਰਕਾਰੀ ਵਕੀਲਾਂ ਦੇ ਠੋਸ ਯਤਨਾਂ ਤੇ ਸਬੂਤਾਂ ਸਦਕਾ ਅਦਾਲਤ ਨੇ ਦੋਵਾਂ ਦੋਸ਼ੀਆਂ ਨੂੰ ਮੌਤ ਦੀ ਸਜ਼ਾ ਸੁਣਾਈ ਹੈ। ਕੇਸ ਵਿੱਚ ਸ਼ਲਾਘਾਯੋਗ ਕੰਮ ਕਰਨ ਵਾਲੀ ਜਾਂਚ ਟੀਮ ਨੂੰ ਪ੍ਰਸ਼ੰਸਾ ਪੱਤਰ ਅਤੇ ਨਕਦ ਇਨਾਮ ਦਿੱਤਾ ਜਾਵੇਗਾ।
ਫਾਂਸੀ ਦੀ ਸਜ਼ਾ ਦਾ ਅੱਗੇ ਕੀ ਹੋਵੇਗਾ ਅਮਲ?
ਜ਼ਿਲ੍ਹਾ ਸਰਕਾਰੀ ਵਕੀਲ (DGC) ਕੇ.ਕੇ. ਚੌਬੇ ਨੇ ਦੱਸਿਆ ਕਿ ਫ਼ੈਸਲੇ ਦੀ ਕਾਪੀ ਮਿਲਣ ਤੋਂ ਬਾਅਦ ਲਗਭਗ ਇੱਕ ਹਫ਼ਤੇ ਦੇ ਅੰਦਰ ਇਹ ਕੇਸ ਹਾਈਕੋਰਟ ਕੋਲ ਪੁਸ਼ਟੀ (Confirmation) ਲਈ ਭੇਜਿਆ ਜਾਵੇਗਾ।
-
ਜੇਕਰ ਹਾਈਕੋਰਟ ਸਜ਼ਾ ਬਰਕਰਾਰ ਰੱਖਦੀ ਹੈ, ਤਾਂ ਇਹ ਮਾਮਲਾ ਸੁਪਰੀਮ ਕੋਰਟ ਜਾਵੇਗਾ।
-
ਸੁਪਰੀਮ ਕੋਰਟ ਵੱਲੋਂ ਮੋਹਰ ਲੱਗਣ ਮਗਰੋਂ ਦੋਸ਼ੀ ਰਾਸ਼ਟਰਪਤੀ ਕੋਲ ਰਹਿਮ ਦੀ ਅਪੀਲ ਦਾਇਰ ਕਰ ਸਕਦੇ ਹਨ।
-
ਰਾਸ਼ਟਰਪਤੀ ਵੱਲੋਂ ਪਟੀਸ਼ਨ ਖਾਰਜ ਹੋਣ 'ਤੇ ਹੀ ਫਾਂਸੀ ਦੀ ਤਰੀਕ ਤੈਅ ਹੋਵੇਗੀ। ਇਸ ਸਾਰੀ ਕਾਨੂੰਨੀ ਪ੍ਰਕਿਰਿਆ ਵਿੱਚ 2 ਤੋਂ 3 ਸਾਲ ਦਾ ਸਮਾਂ ਲੱਗ ਸਕਦਾ ਹੈ।
ਮੇਰਠ ਜੇਲ੍ਹ ਦਾ ਇਤਿਹਾਸ: ਪਹਿਲੀ ਮਹਿਲਾ ਜਿਸ ਨੂੰ ਸੁਣਾਈ ਗਈ ਫਾਂਸੀ
ਸੀਨੀਅਰ ਜੇਲ੍ਹ ਸੁਪਰਡੈਂਟ ਡਾ. ਵੀਰੇਸ਼ ਰਾਜ ਸ਼ਰਮਾ ਅਨੁਸਾਰ, ਚੌਧਰੀ ਚਰਨ ਸਿੰਘ ਜ਼ਿਲ੍ਹਾ ਜੇਲ੍ਹ ਵਿੱਚ ਆਖ਼ਰੀ ਵਾਰ ਸਾਲ 1975 ਵਿੱਚ ਮੁਜ਼ੱਫ਼ਰਨਗਰ ਦੇ ਕਰਮ ਸਿੰਘ ਨੂੰ ਫਾਂਸੀ ਦਿੱਤੀ ਗਈ ਸੀ। ਜੇਕਰ ਮੁਸਕਾਨ ਅਤੇ ਸਾਹਿਲ ਨੂੰ ਇੱਥੇ ਫਾਂਸੀ ਹੁੰਦੀ ਹੈ, ਤਾਂ ਸਾਹਿਲ ਮੇਰਠ ਜੇਲ੍ਹ ਵਿੱਚ ਫਾਂਸੀ ਪਾਉਣ ਵਾਲਾ ਦੂਜਾ ਪੁਰਸ਼ ਅਤੇ ਮੁਸਕਾਨ ਇਤਿਹਾਸ ਦੀ ਪਹਿਲੀ ਮਹਿਲਾ ਹੋਵੇਗੀ।
.png)
ਜੇਲ੍ਹ ਅੰਦਰ ਬਦਲਿਆ ਨਿਯਮ: ਹੁਣ ਪਹਿਨਣੇ ਪੈਣਗੇ ਖ਼ਾਸ ਕੱਪੜੇ
ਮੌਤ ਦੀ ਸਜ਼ਾ ਦੇ ਐਲਾਨ ਤੋਂ ਬਾਅਦ ਜੇਲ੍ਹ ਪ੍ਰਸ਼ਾਸਨ ਨੇ ਦੋਵਾਂ ਲਈ ਸੁਰੱਖਿਆ ਪ੍ਰਬੰਧ ਸਖ਼ਤ ਕਰ ਦਿੱਤੇ ਹਨ:
-
ਦੋਵਾਂ ਨੂੰ 24 ਘੰਟਿਆਂ ਦੇ ਅੰਦਰ ਵੱਖਰੀ ਵਿਸ਼ੇਸ਼ ਬੈਰਕ (ਫਾਂਸੀ ਚੱਕੀ) ਵਿੱਚ ਤਬਦੀਲ ਕੀਤਾ ਜਾ ਰਿਹਾ ਹੈ।
-
ਹੁਣ ਤੱਕ ਸਾਧਾਰਨ ਕੱਪੜੇ ਪਹਿਨਣ ਵਾਲੀ ਮੁਸਕਾਨ ਨੂੰ ਹੁਣ ਕਰੀਮ ਰੰਗ ਦੀ ਸਾੜ੍ਹੀ ਜਾਂ ਸੂਟ ਪਹਿਨਣਾ ਪਵੇਗਾ, ਜਦਕਿ ਸਾਹਿਲ ਨੂੰ ਚਿੱਟਾ ਕੁੜਤਾ-ਪਜਾਮਾ ਦਿੱਤਾ ਜਾਵੇਗਾ।
-
ਜਲਦ ਹੀ ਦੋਵਾਂ ਨੂੰ ਨਵੇਂ ਕੈਦੀ ਨੰਬਰ ਵੀ ਅਲਾਟ ਕਰ ਦਿੱਤੇ ਜਾਣਗੇ।
-(60).jpeg)
-(71).jpeg)