ਜ਼ਿੰਬਾਬਵੇ ਖ਼ਿਲਾਫ਼ 91 ਦੌੜਾਂ ਦੀ ਤੂਫ਼ਾਨੀ ਪਾਰੀ ਤੋਂ ਬਾਅਦ ਭਾਵੁਕ ਹੋਈ ਹਰਮਨਪ੍ਰੀਤ ਕੌਰ

ਭਾਰਤੀ ਮਹਿਲਾ ਕ੍ਰਿਕਟ ਟੀਮ ਦੀ ਸਟਾਰ ਬੱਲੇਬਾਜ਼ ਅਤੇ ਸਾਬਕਾ ਕਪਤਾਨ ਹਰਮਨਪ੍ਰੀਤ ਕੌਰ ਨੇ ਮੰਗਲਵਾਰ (20 ਅਕਤੂਬਰ) ਨੂੰ ਜ਼ਿੰਬਾਬਵੇ ਖ਼ਿਲਾਫ਼ ਖੇਡੇ ਗਏ ਤੀਜੇ ਟੀ-20 ਮੁਕਾਬਲੇ ਵਿੱਚ ਸ਼ਾਨਦਾਰ ਬੱਲੇਬਾਜ਼ੀ ਕੀਤੀ। ਹਰਮਨਪ੍ਰੀਤ ਨੇ ਮਹਿਜ਼ 41 ਗੇਂਦਾਂ ਵਿੱਚ ਨਾਬਾਦ 91 ਦੌੜਾਂ ਬਣਾ ਕੇ ਸ਼ਾਨਦਾਰ ਫ਼ਾਰਮ ਵਿੱਚ ਵਾਪਸੀ ਕੀਤੀ। ਹਾਲਾਂਕਿ, ਇਸ ਧਮਾਕੇਦਾਰ ਪਾਰੀ ਤੋਂ ਬਾਅਦ ਇਨਿੰਗਜ਼ ਬ੍ਰੇਕ ਦੌਰਾਨ ਹੋਏ ਲਾਈਵ ਇੰਟਰਵਿਊ ਵਿੱਚ ਉਹ ਭਾਵੁਕ ਹੋ ਗਈ ਅਤੇ ਉਨ੍ਹਾਂ ਦੀਆਂ ਅੱਖਾਂ ਵਿੱਚੋਂ ਹੰਝੂ ਵਹਿ ਤੁਰੇ।

ਇੰਟਰਵਿਊ ਦੌਰਾਨ ਹਰਮਨਪ੍ਰੀਤ ਦੇ ਸਾਹਮਣੇ ਸਾਬਕਾ ਭਾਰਤੀ ਕੋਚ ਡਬਲਯੂ.ਵੀ. ਰਮਨ ਸਨ। ਗੱਲਬਾਤ ਕਰਦਿਆਂ ਹਰਮਨਪ੍ਰੀਤ ਨੇ ਕਿਹਾ ਕਿ ਉਹ ਮੈਦਾਨ 'ਤੇ ਜਾ ਕੇ ਖੁੱਲ੍ਹ ਕੇ ਆਪਣੀ ਖੇਡ ਦਾ ਆਨੰਦ ਲੈਣਾ ਚਾਹੁੰਦੀ ਸੀ। ਆਪਣੀ ਬੱਲੇਬਾਜ਼ੀ ਵਿੱਚ ਮਿਲੇ ਸਹਿਯੋਗ ਲਈ ਧੰਨਵਾਦ ਕਰਦੇ ਹੋਏ ਉਹ ਭਾਵੁਕ ਹੋ ਗਈ ਅਤੇ ਇਸ ਤੋਂ ਬਾਅਦ ਮਾਈਕ ਰੱਖ ਕੇ ਉੱਥੋਂ ਚਲੀ ਗਈ।

ਦੱਸ ਦੇਈਏ ਕਿ ਪੰਜਾਬ ਦੀ ਧੀ ਹਰਮਨਪ੍ਰੀਤ ਕੌਰ ਨੇ ਹਾਲ ਹੀ ਵਿੱਚ (6 ਅਕਤੂਬਰ ਨੂੰ) ਕ੍ਰਿਕਟ ਦੇ ਤਿੰਨਾਂ ਫਾਰਮੈਟਾਂ ਦੀ ਕਪਤਾਨੀ ਤੋਂ ਅਸਤੀਫ਼ਾ ਦੇ ਦਿੱਤਾ ਸੀ। ਹੁਣ ਉਹ ਟੀਮ ਵਿੱਚ ਬਤੌਰ ਮੁੱਖ ਖਿਡਾਰੀ ਖੇਡ ਰਹੀ ਹੈ ਅਤੇ ਉਨ੍ਹਾਂ ਦੀ ਥਾਂ ਸਮ੍ਰਿਤੀ ਮੰਧਾਨਾ ਨੂੰ ਭਾਰਤੀ ਟੀਮ ਦੀ ਨਵੀਂ ਕਮਾਨ ਸੌਂਪੀ ਗਈ ਹੈ।

ਲਾਈਵ ਇੰਟਰਵਿਊ ਦੇ ਮੁੱਖ ਅੰਸ਼: ਡਬਲਯੂ.ਵੀ. ਰਮਨ ਦੇ ਸਵਾਲ ਅਤੇ ਹਰਮਨ ਦੇ ਜਵਾਬ

• ਸਵਾਲ: ਟੀ-20 ਅੰਤਰਰਾਸ਼ਟਰੀ ਵਿੱਚ ਆਪਣਾ ਦੂਜਾ ਸਭ ਤੋਂ ਵੱਡਾ ਸਕੋਰ ਬਣਾ ਕੇ ਕਿਵੇਂ ਮਹਿਸੂਸ ਹੋ ਰਿਹਾ ਹੈ?

  ਜਵਾਬ: "ਬਹੁਤ ਚੰਗਾ ਲੱਗ ਰਿਹਾ ਹੈ। ਮੈਂ ਬੱਸ ਆਪਣੀ ਖੇਡ ਦਾ ਆਨੰਦ ਲੈਣਾ ਚਾਹੁੰਦੀ ਸੀ। ਖੁਸ਼ੀ ਹੈ ਕਿ ਮੈਨੂੰ ਕ੍ਰੀਜ਼ 'ਤੇ ਕਾਫ਼ੀ ਸਮਾਂ ਬਿਤਾਉਣ ਦਾ ਮੌਕਾ ਮਿਲਿਆ ਅਤੇ ਮੈਂ ਆਪਣੀ ਬੱਲੇਬਾਜ਼ੀ ਦਾ ਪੂਰਾ ਲੁਤਫ਼ ਉਠਾ ਸਕੀ।"

• ਸਵਾਲ: ਇਸ ਮੈਚ ਵਿੱਚ ਉਤਰਦੇ ਸਮੇਂ ਤੁਹਾਡਾ ਕੀ ਫੋਕਸ ਸੀ?

  ਜਵਾਬ: "ਮੇਰਾ ਧਿਆਨ ਸਿਰਫ਼ ਖੇਡ ਦਾ ਆਨੰਦ ਲੈਣ ਅਤੇ ਵੱਧ ਤੋਂ ਵੱਧ ਸਮਾਂ ਬੱਲੇਬਾਜ਼ੀ ਕਰਨ 'ਤੇ ਸੀ। ਮੈਨੂੰ ਖੁਸ਼ੀ ਹੈ ਕਿ ਮੈਂ ਅਜਿਹਾ ਕਰ ਸਕੀ।"

• ਸਵਾਲ: ਤੁਹਾਡੀ ਬੱਲੇਬਾਜ਼ੀ ਦੇਖ ਕੇ ਲੱਗ ਰਿਹਾ ਸੀ ਕਿ ਤੁਸੀਂ ਕਾਫ਼ੀ ਆਨੰਦ ਲੈ ਰਹੇ ਸੀ ਅਤੇ ਦਰਸ਼ਕਾਂ ਦਾ ਵੀ ਖੂਬ ਮਨੋਰੰਜਨ ਕੀਤਾ?

  ਜਵਾਬ: "ਹਾਂਜੀ ਸਰ, ਬਿਲਕੁਲ। ਮੈਂ ਇਸ ਦਾ ਸਿਹਰਾ ਤੁਹਾਨੂੰ ਵੀ ਦੇਣਾ ਚਾਹਾਂਗੀ। ਜਦੋਂ ਤੁਸੀਂ ਮੈਨੂੰ ਇੱਕ ਪਾਸੇ ਲਿਜਾ ਕੇ ਕਿਹਾ ਕਿ 'ਹੁਣ ਉਹੀ ਕਰੋ ਜੋ ਤੁਸੀਂ ਕਰਨਾ ਚਾਹੁੰਦੇ ਹੋ', ਤਾਂ ਮੈਨੂੰ ਬਹੁਤ ਹੌਸਲਾ ਮਿਲਿਆ। ਮੈਂ ਵੀ ਇਹੀ ਚਾਹੁੰਦੀ ਸੀ। ਤੁਹਾਡੇ ਸ਼ਬਦਾਂ ਲਈ ਬਹੁਤ-ਬਹੁਤ ਧੰਨਵਾਦ।"

• ਸਵਾਲ: ਹਰਮਨ, ਤੁਹਾਡੀ ਟਾਈਮਿੰਗ ਹਮੇਸ਼ਾ ਸ਼ਾਨਦਾਰ ਹੁੰਦੀ ਹੈ। ਮੈਚ ਤੋਂ ਪਹਿਲਾਂ ਨੈੱਟਸ 'ਤੇ ਤੁਸੀਂ ਕਿਸ ਚੀਜ਼ 'ਤੇ ਧਿਆਨ ਦਿੰਦੇ ਹੋ?

  ਜਵਾਬ: "ਏਸ਼ੀਅਨ ਗੇਮਜ਼ ਤੋਂ ਬਾਅਦ ਮੈਨੂੰ ਨੈੱਟਸ 'ਤੇ ਅਭਿਆਸ ਕਰਨ ਦਾ ਸਮਾਂ ਮਿਲਿਆ। ਮੈਂ ਹਿਮਾਂਸ਼ੂ ਭਈਆ ਦਾ ਖ਼ਾਸ ਧੰਨਵਾਦ ਕਰਨਾ ਚਾਹੁੰਦੀ ਹਾਂ, ਜੋ ਮੇਰੀ ਖੇਡ 'ਤੇ ਸਖ਼ਤ ਮਿਹਨਤ ਕਰ ਰਹੇ ਹਨ। ਮੇਰੀ ਅੱਜ ਦੀ ਬੱਲੇਬਾਜ਼ੀ ਦਾ ਕ੍ਰੈਡਿਟ ਉਨ੍ਹਾਂ ਨੂੰ ਜਾਂਦਾ ਹੈ।" (ਇਹ ਕਹਿੰਦਿਆਂ ਹਰਮਨ ਦੀਆਂ ਅੱਖਾਂ ਵਿੱਚੋਂ ਹੰਝੂ ਛਲਕ ਪਏ)

• ਸਵਾਲ: ਅੱਜ ਤੁਸੀਂ ਕਾਫ਼ੀ ਖੁੱਲ੍ਹ ਕੇ ਖੇਡਦੇ ਨਜ਼ਰ ਆਏ, ਕੀ ਤੁਹਾਨੂੰ ਵੀ ਅਜਿਹਾ ਮਹਿਸੂਸ ਹੋਇਆ?

  ਜਵਾਬ: "ਜੀ, ਬਿਲਕੁਲ।"

3 ਨੁਕਤਿਆਂ ਵਿੱਚ ਸਮਝੋ: ਕਪਤਾਨੀ ਛੱਡਣ ਦੀ ਅੰਦਰੂਨੀ ਕਹਾਣੀ

1. BCCI ਦੀ ਰੀਵਿਊ ਮੀਟਿੰਗ ਅਤੇ ਨਵੀਂ ਲੀਡਰਸ਼ਿਪ ਦੀ ਭਾਲ: ਗੁਵਾਹਾਟੀ ਵਿੱਚ ਬੀਸੀਸੀਆਈ ਦੀ ਇੱਕ ਉੱਚ ਪੱਧਰੀ ਰੀਵਿਊ ਮੀਟਿੰਗ ਹੋਈ, ਜਿਸ ਵਿੱਚ ਸਕੱਤਰ ਦੇਵਜੀਤ ਸੈਕੀਆ, ਚੋਣਕਾਰ, ਮੁੱਖ ਕੋਚ ਅਮੋਲ ਮਜ਼ੂਮਦਾਰ ਅਤੇ ਸਮ੍ਰਿਤੀ ਮੰਧਾਨਾ ਸ਼ਾਮਲ ਸਨ। ਟੀ-20 ਵਿਸ਼ਵ ਕੱਪ ਦੇ ਨਾਕਆਊਟ ਪੜਾਅ ਤੋਂ ਲਗਾਤਾਰ ਬਾਹਰ ਹੋਣ ਤੋਂ ਬਾਅਦ ਭਵਿੱਖ ਦੀ ਅਗਵਾਈ 'ਤੇ ਚਰਚਾ ਹੋਈ। ਚੋਣਕਾਰਾਂ ਦਾ ਮੰਨਣਾ ਸੀ ਕਿ ਹੁਣ ਸਮ੍ਰਿਤੀ ਮੰਧਾਨਾ ਨੂੰ ਟੀਮ ਦੀ ਵਾਗਡੋਰ ਸੌਂਪਣ ਦਾ ਸਹੀ ਸਮਾਂ ਹੈ।

2. ਬੋਰਡ ਅਤੇ ਹਰਮਨਪ੍ਰੀਤ ਦੀ ਸੋਚ ਵਿੱਚ ਅੰਤਰ: ਰਿਪੋਰਟਾਂ ਅਨੁਸਾਰ, ਬੋਰਡ ਚਾਹੁੰਦਾ ਸੀ ਕਿ ਹਰਮਨਪ੍ਰੀਤ ਟੀ-20 ਦੀ ਕਪਤਾਨੀ ਛੱਡ ਦੇਣ। ਹਾਲਾਂਕਿ, ਹਰਮਨਪ੍ਰੀਤ ਵਨਡੇ ਅਤੇ ਟੈਸਟ ਟੀਮ ਦੀ ਕਪਤਾਨੀ ਜਾਰੀ ਰੱਖਣਾ ਚਾਹੁੰਦੀ ਸੀ ਤਾਂ ਜੋ ਆਪਣੇ ਤਜਰਬੇ ਨਾਲ ਨੌਜਵਾਨ ਖਿਡਾਰੀਆਂ ਦੀ ਅਗਵਾਈ ਕਰ ਸਕੇ। ਇਸ ਬਦਲਾਅ ਨੂੰ ਲੈ ਕੇ ਦੋਵਾਂ ਧਿਰਾਂ ਵਿਚਾਲੇ ਸੋਚ ਦਾ ਅੰਤਰ ਸਾਹਮਣੇ ਆਇਆ।

3. ਤਿੰਨਾਂ ਫਾਰਮੈਟਾਂ ਤੋਂ ਅਸਤੀਫ਼ਾ: ਬਦਲਦੀ ਸਥਿਤੀ ਨੂੰ ਵੇਖਦੇ ਹੋਏ ਹਰਮਨਪ੍ਰੀਤ ਕੌਰ ਨੇ ਤਿੰਨਾਂ ਫਾਰਮੈਟਾਂ ਦੀ ਕਪਤਾਨੀ ਛੱਡਣ ਦਾ ਵੱਡਾ ਫੈਸਲਾ ਲਿਆ। 6 ਅਕਤੂਬਰ ਨੂੰ ਉਨ੍ਹਾਂ ਨੇ ਸੋਸ਼ਲ ਮੀਡੀਆ 'ਤੇ ਭਾਵੁਕ ਪੋਸਟ ਪਾ ਕੇ ਆਪਣੇ ਲਗਭਗ 10 ਸਾਲਾਂ ਦੇ ਕਪਤਾਨੀ ਸਫ਼ਰ ਨੂੰ ਅਲਵਿਦਾ ਕਹਿ ਦਿੱਤਾ।