ਮਥੁਰਾ ਵਿੱਚ ਅੱਜ ਸ਼੍ਰੀ ਕ੍ਰਿਸ਼ਨ ਜਨਮ ਅਸ਼ਟਮੀ ਦੀ ਭਾਰੀ ਧੂਮਧਾਮ ਹੈ। ਉੱਤਰ ਪ੍ਰਦੇਸ਼ ਦੇ ਮੁੱਖ ਮੰਤਰੀ ਯੋਗੀ ਆਦਿੱਤਿਆਨਾਥ ਨੇ ਸ਼੍ਰੀ ਕ੍ਰਿਸ਼ਨ ਜਨਮ ਭੂਮੀ ਮੰਦਰ ਵਿੱਚ ਵਿਸ਼ੇਸ਼ ਪੂਜਾ-ਅਰਚਨਾ ਕੀਤੀ ਅਤੇ ਸ਼ਰਧਾਲੂਆਂ 'ਤੇ ਫੁੱਲਾਂ ਦੀ ਵਰਖਾ ਕੀਤੀ। ਮੰਦਰ ਪਰਿਸਰ ਤੋਂ ਸ਼ਰਧਾਲੂਆਂ ਨੂੰ ਸੰਬੋਧਨ ਕਰਦਿਆਂ ਸੀਐਮ ਯੋਗੀ ਨੇ ਕਿਹਾ ਕਿ ਭਾਰਤ 'ਤੇ ਕਈ ਹਮਲੇ ਹੋਏ, ਪਰ ਸਨਾਤਨ ਧਰਮ ਦੀ ਆਸਥਾ ਨੂੰ ਕੋਈ ਖ਼ਤਮ ਨਹੀਂ ਕਰ ਸਕਿਆ। ਉਨ੍ਹਾਂ ਕਿਹਾ ਕਿ ਜਿਨ੍ਹਾਂ ਨੇ ਅਜਿਹਾ ਕਰਨ ਦੀ ਕੋਸ਼ਿਸ਼ ਕੀਤੀ, ਉਹ ਮਿੱਟੀ ਵਿੱਚ ਮਿਲ ਗਏ ਅਤੇ ਅੱਜ ਉਨ੍ਹਾਂ ਦਾ ਨਾਮ ਲੈਣ ਵਾਲਾ ਵੀ ਕੋਈ ਨਹੀਂ ਹੈ।

ਵਿਰੋਧੀਆਂ 'ਤੇ ਨਿਸ਼ਾਨਾ ਸਾਧਦਿਆਂ ਉਨ੍ਹਾਂ ਕਿਹਾ ਕਿ ਸਰਕਾਰ ਦੀ ਆਸਥਾ ਸ਼੍ਰੀ ਕ੍ਰਿਸ਼ਨ, ਸ਼੍ਰੀ ਰਾਮ, ਬਾਬਾ ਵਿਸ਼ਵਨਾਥ ਅਤੇ ਮਾਂ ਵਿੰਧਿਆਵਾਸਿਨੀ ਵਿੱਚ ਹੈ। ਪਰ ਜਿਨ੍ਹਾਂ ਦੀ ਆਸਥਾ ਬਾਬਰ ਅਤੇ ਔਰੰਗਜ਼ੇਬ ਵਿੱਚ ਹੈ, ਉਹ ਜਨਤਾ ਦੀਆਂ ਧਾਰਮਿਕ ਭਾਵਨਾਵਾਂ ਦਾ ਕਦੇ ਸਤਿਕਾਰ ਨਹੀਂ ਕਰ ਸਕਦੇ। ਉਨ੍ਹਾਂ ਅੱਗੇ ਕਿਹਾ ਕਿ ਜਿਨ੍ਹਾਂ ਨੂੰ ਅਯੁੱਧਿਆ ਦਾ ਸ਼ਾਨਦਾਰ ਰਾਮ ਮੰਦਰ ਪਸੰਦ ਨਹੀਂ ਆ ਰਿਹਾ, ਉਹ ਅਯੁੱਧਿਆ ਨੂੰ ਬਦਨਾਮ ਕਰਨ ਦੀਆਂ ਕੋਸ਼ਿਸ਼ਾਂ ਵਿੱਚ ਜੁਟੇ ਹਨ। ਸਰਕਾਰ ਦਾ ਟੀਚਾ ਮਥੁਰਾ-ਵ੍ਰਿੰਦਾਵਨ ਨੂੰ ਵੀ ਅਯੁੱਧਿਆ ਅਤੇ ਕਾਸ਼ੀ ਵਾਂਗ ਸ਼ਾਨਦਾਰ ਬਣਾਉਣ ਦਾ ਹੈ।

ਸ਼੍ਰੀ ਕ੍ਰਿਸ਼ਨ ਦੇ 5253ਵੇਂ ਜਨਮ ਉਤਸਵ ਮੌਕੇ ਬਾਂਕੇ ਬਿਹਾਰੀ ਮੰਦਰ ਵਿੱਚ ਭਗਤਾਂ ਦੀਆਂ ਲੰਬੀਆਂ ਕਤਾਰਾਂ ਲੱਗੀਆਂ ਹੋਈਆਂ ਹਨ। ਤੜਕਸਾਰ ਮੰਗਲਾ ਆਰਤੀ ਵਿੱਚ 10 ਹਜ਼ਾਰ ਤੋਂ ਵੱਧ ਸ਼ਰਧਾਲੂ ਸ਼ਾਮਲ ਹੋਏ। ਪ੍ਰਸ਼ਾਸਨ ਮੁਤਾਬਕ ਇਸ ਸਮਾਗਮ ਦੌਰਾਨ ਦੇਸ਼-ਵਿਦੇਸ਼ ਤੋਂ ਲਗਭਗ 50 ਲੱਖ ਸ਼ਰਧਾਲੂਆਂ ਦੇ ਪਹੁੰਚਣ ਦੀ ਉਮੀਦ ਹੈ।

ਅੱਧੀ ਰਾਤ ਨੂੰ ਹੋਵੇਗਾ ਕਾਨ੍ਹਾ ਦਾ ਜਨਮ

ਸ਼੍ਰੀ ਕ੍ਰਿਸ਼ਨ ਜਨਮ ਭੂਮੀ ਮੰਦਰ ਵਿੱਚ ਰਾਤ 12 ਵਜੇ ਕਾਨ੍ਹਾ ਦਾ ਜਨਮ ਹੋਵੇਗਾ:

• ਰਾਤ 11:55 ਵਜੇ 5 ਮਿੰਟ ਲਈ ਕਪਾਟ ਬੰਦ ਰਹਿਣਗੇ, ਜਿਸ ਦੌਰਾਨ ਕਾਨ੍ਹਾ ਨੂੰ ਪੰਚਰਤਨੀ ਪੀਲੀ ਪੁਸ਼ਾਕ ਅਤੇ ਰਤਨ ਜੜਤ ਗਹਿਣਿਆਂ ਨਾਲ ਸਜਾਇਆ ਜਾਵੇਗਾ।

• ਜਨਮ ਵੇਲੇ ਉਜੈਨ ਤੋਂ ਆਏ ਡਮਰੂ ਅਤੇ ਮ੍ਰਿਦੰਗ ਵਾਦਕ ਮੰਗਲ ਧੁਨੀ ਨਾਲ ਸੰਕੀਰਤਨ ਕਰਨਗੇ।

• ਆਰਤੀ ਤੋਂ ਬਾਅਦ ਪ੍ਰਤਿਮਾ ਨੂੰ ਗਰਭਗ੍ਰਹਿ ਤੋਂ ਬਾਹਰ ਲਿਆਂਦਾ ਜਾਵੇਗਾ ਅਤੇ ਕਾਮਧੇਨੂ ਗਾਂ ਦੇ ਦੁੱਧ ਤੇ ਪੰਚਾਮ੍ਰਿਤ ਨਾਲ ਪਵਿੱਤਰ ਇਸ਼ਨਾਨ ਕਰਵਾਇਆ ਜਾਵੇਗਾ।

• 12:45 ਵਜੇ ਸ਼ਯਨ ਆਰਤੀ ਉਪਰੰਤ ਕਪਾਟ ਬੰਦ ਕੀਤੇ ਜਾਣਗੇ। ਮੰਦਰ ਦੇ ਗਰਭਗ੍ਰਹਿ ਨੂੰ 200 ਕਿਲੋ ਚਾਂਦੀ ਅਤੇ ਫੁੱਲਾਂ ਨਾਲ ਸਜਾਇਆ ਗਿਆ ਹੈ।

ਦੂਜੇ ਪਾਸੇ ਠਾਕੁਰ ਦੁਆਰਕਾਧੀਸ਼ ਮੰਦਰ ਵਿੱਚ ਵੀ ਦੁੱਧ, ਦਹੀਂ, ਘਿਓ, ਖੰਡ ਅਤੇ ਸ਼ਹਿਦ ਨਾਲ ਭਗਵਾਨ ਦਾ ਪੰਚਾਮ੍ਰਿਤ ਅਭਿਸ਼ੇਕ ਕਰਕੇ ਸ਼ਿੰਗਾਰ ਕੀਤਾ ਗਿਆ ਹੈ।