ਏਸ਼ੀਆਈ ਖੇਡਾਂ 2026: ਸਾਵਨ ਬਰਵਾਲ ਨੇ ਰਚਿਆ ਇਤਿਹਾਸ, 44 ਸਾਲ ਬਾਅਦ ਮੈਰਾਥਨ ’ਚ ਭਾਰਤ ਨੂੰ ਮੈਡਲ

ਨਾਗੋਆ: ਏਸ਼ੀਆਈ ਖੇਡਾਂ 2026 ਵਿੱਚ ਭਾਰਤ ਲਈ ਐਥਲੈਟਿਕਸ ਤੋਂ ਵੱਡੀ ਖ਼ਬਰ ਸਾਹਮਣੇ ਆਈ ਹੈ। ਭਾਰਤੀ ਦੌੜਾਕ ਸਾਵਨ ਬਰਵਾਲ ਨੇ ਪੁਰਸ਼ਾਂ ਦੀ ਮੈਰਾਥਨ ਮੁਕਾਬਲੇ ਵਿੱਚ ਚਾਂਦੀ ਦਾ ਤਗਮਾ ਜਿੱਤ ਕੇ ਇਤਿਹਾਸ ਰਚ ਦਿੱਤਾ ਹੈ। ਉਨ੍ਹਾਂ ਦੀ ਇਸ ਪ੍ਰਾਪਤੀ ਨਾਲ ਭਾਰਤ ਦਾ ਏਸ਼ੀਆਈ ਖੇਡਾਂ ਦੀ ਮੈਰਾਥਨ ਵਿੱਚ 44 ਸਾਲਾਂ ਦਾ ਇੰਤਜ਼ਾਰ ਖ਼ਤਮ ਹੋ ਗਿਆ ਹੈ। 

ਸਾਵਨ ਬਰਵਾਲ ਨੇ 42.195 ਕਿਲੋਮੀਟਰ ਦੀ ਮੈਰਾਥਨ ਦੌੜ 2 ਘੰਟੇ 11 ਮਿੰਟ 37 ਸਕਿੰਟ ਵਿੱਚ ਪੂਰੀ ਕਰਦਿਆਂ ਦੂਜਾ ਸਥਾਨ ਹਾਸਲ ਕੀਤਾ। ਇਹ ਉਨ੍ਹਾਂ ਦਾ ਨਿੱਜੀ ਸਰਵੋਤਮ ਪ੍ਰਦਰਸ਼ਨ ਵੀ ਰਿਹਾ ਅਤੇ ਰਿਪੋਰਟਾਂ ਮੁਤਾਬਕ ਉਨ੍ਹਾਂ ਨੇ ਆਪਣਾ ਰਾਸ਼ਟਰੀ ਰਿਕਾਰਡ ਵੀ ਹੋਰ ਬਿਹਤਰ ਕੀਤਾ। 

44 ਸਾਲ ਬਾਅਦ ਮਿਲਿਆ ਮੈਡਲ

ਭਾਰਤ ਨੇ ਏਸ਼ੀਆਈ ਖੇਡਾਂ ਦੀ ਪੁਰਸ਼ਾਂ ਦੀ ਮੈਰਾਥਨ ਵਿੱਚ ਆਖਰੀ ਵਾਰ 1982 ਵਿੱਚ ਮੈਡਲ ਜਿੱਤਿਆ ਸੀ। ਉਸ ਤੋਂ ਬਾਅਦ ਇਸ ਇਵੈਂਟ ਵਿੱਚ ਭਾਰਤ ਨੂੰ ਪੋਡਿਅਮ ’ਤੇ ਜਗ੍ਹਾ ਨਹੀਂ ਮਿਲੀ। ਸਾਵਨ ਬਰਵਾਲ ਦੀ ਚਾਂਦੀ ਨੇ ਇਸ ਲੰਬੇ ਇੰਤਜ਼ਾਰ ਨੂੰ ਖ਼ਤਮ ਕਰ ਦਿੱਤਾ। 

ਇਹ ਏਸ਼ੀਆਈ ਖੇਡਾਂ ਵਿੱਚ ਮੈਰਾਥਨ ਦੇ ਇਤਿਹਾਸ ਵਿੱਚ ਭਾਰਤ ਦਾ ਚੌਥਾ ਮੈਡਲ ਦੱਸਿਆ ਜਾ ਰਿਹਾ ਹੈ। ਇਸ ਤੋਂ ਪਹਿਲਾਂ ਭਾਰਤ ਨੇ 1951 ਅਤੇ 1982 ਦੀਆਂ ਖੇਡਾਂ ਵਿੱਚ ਇਸ ਇਵੈਂਟ ਵਿੱਚ ਮੈਡਲ ਹਾਸਲ ਕੀਤੇ ਸਨ। 2026 ਵਿੱਚ ਮਿਲਿਆ ਇਹ ਮੈਡਲ ਵਿਦੇਸ਼ੀ ਧਰਤੀ ’ਤੇ ਏਸ਼ੀਆਈ ਖੇਡਾਂ ਦੀ ਮੈਰਾਥਨ ਵਿੱਚ ਭਾਰਤ ਦਾ ਪਹਿਲਾ ਪੋਡਿਅਮ ਫਿਨਿਸ਼ ਵੀ ਹੈ। 

ਦੌੜ ਵਿੱਚ ਸ਼ੁਰੂ ਤੋਂ ਹੀ ਅੱਗੇ ਰਹੇ ਬਰਵਾਲ

ਮੈਰਾਥਨ ਦੌਰਾਨ ਸਾਵਨ ਬਰਵਾਲ ਨੇ ਸ਼ੁਰੂਆਤੀ ਪੜਾਅ ਤੋਂ ਹੀ ਅਗਲੇ ਦੌੜਾਕਾਂ ਵਿੱਚ ਆਪਣੀ ਜਗ੍ਹਾ ਬਣਾਈ ਰੱਖੀ। ਉਹ ਦੌੜ ਦੇ ਅੱਧੇ ਪੜਾਅ ’ਤੇ ਦੂਜੇ ਸਥਾਨ ’ਤੇ ਸਨ ਅਤੇ 35 ਕਿਲੋਮੀਟਰ ਦੇ ਪੜਾਅ ਤੱਕ ਵੀ ਉਨ੍ਹਾਂ ਨੇ ਆਪਣੀ ਸਥਿਤੀ ਬਰਕਰਾਰ ਰੱਖੀ। ਆਖਰੀ ਪੜਾਅ ਵਿੱਚ ਜਾਪਾਨ ਦੇ ਇਚਿਤਾਕਾ ਯਾਮਾਸ਼ਿਤਾ ਨੇ ਲੀਡ ਮਜ਼ਬੂਤ ਕੀਤੀ, ਪਰ ਬਰਵਾਲ ਨੇ ਆਪਣੀ ਗਤੀ ਕਾਇਮ ਰੱਖਦਿਆਂ ਚਾਂਦੀ ਦਾ ਤਗਮਾ ਪੱਕਾ ਕੀਤਾ।

ਜਾਪਾਨ ਦੇ ਇਚਿਤਾਕਾ ਯਾਮਾਸ਼ਿਤਾ ਨੇ 2:10:49 ਦੇ ਸਮੇਂ ਨਾਲ ਸੋਨ ਤਗਮਾ ਜਿੱਤਿਆ, ਜਦਕਿ ਚੀਨ ਦੇ ਪੇਈਯੂ ਫੇਂਗ ਨੇ 2:12:13 ਦੇ ਸਮੇਂ ਨਾਲ ਕਾਂਸੀ ਦਾ ਤਗਮਾ ਹਾਸਲ ਕੀਤਾ। 

ਰਾਸ਼ਟਰੀ ਰਿਕਾਰਡ ਵੀ ਕੀਤਾ ਬਿਹਤਰ

ਸਾਵਨ ਬਰਵਾਲ ਲਈ ਇਹ ਪ੍ਰਦਰਸ਼ਨ ਇਸ ਲਈ ਵੀ ਖ਼ਾਸ ਹੈ ਕਿਉਂਕਿ ਉਹ ਇਸ ਸਾਲ ਪਹਿਲਾਂ ਹੀ ਮੈਰਾਥਨ ਵਿੱਚ ਰਾਸ਼ਟਰੀ ਪੱਧਰ ’ਤੇ ਆਪਣਾ ਨਾਮ ਦਰਜ ਕਰਵਾ ਚੁੱਕੇ ਹਨ। ਅਪ੍ਰੈਲ ਵਿੱਚ ਰੋਟਰਡੈਮ ਮੈਰਾਥਨ ਦੌਰਾਨ ਉਨ੍ਹਾਂ ਨੇ 48 ਸਾਲ ਪੁਰਾਣਾ ਸ਼ਿਵਨਾਥ ਸਿੰਘ ਦਾ ਰਾਸ਼ਟਰੀ ਮੈਰਾਥਨ ਰਿਕਾਰਡ ਤੋੜਿਆ ਸੀ। 

ਹੁਣ ਏਸ਼ੀਆਈ ਖੇਡਾਂ ਵਿੱਚ ਚਾਂਦੀ ਦਾ ਤਗਮਾ ਜਿੱਤ ਕੇ ਸਾਵਨ ਬਰਵਾਲ ਨੇ ਆਪਣੀ ਸ਼ਾਨਦਾਰ ਫਾਰਮ ਨੂੰ ਇੱਕ ਵੱਡੀ ਅੰਤਰਰਾਸ਼ਟਰੀ ਪ੍ਰਾਪਤੀ ਵਿੱਚ ਬਦਲ ਦਿੱਤਾ ਹੈ। ਉਨ੍ਹਾਂ ਦੀ ਇਹ ਉਪਲਬਧੀ ਭਾਰਤੀ ਐਥਲੈਟਿਕਸ ਅਤੇ ਖ਼ਾਸ ਤੌਰ ’ਤੇ ਲੰਬੀ ਦੂਰੀ ਦੀ ਦੌੜ ਲਈ ਮਹੱਤਵਪੂਰਨ ਮੰਨੀ ਜਾ ਰਹੀ ਹੈ।

ਭਾਰਤ ਦੇ ਇੱਕ ਹੋਰ ਮੈਰਾਥਨ ਦੌੜਾਕ ਕਾਰਤਿਕ ਕਰਕੇਰਾ ਨੇ ਵੀ ਮੁਕਾਬਲੇ ਵਿੱਚ ਹਿੱਸਾ ਲਿਆ ਅਤੇ 2:22:41 ਦੇ ਸਮੇਂ ਨਾਲ 19 ਦੌੜਾਕਾਂ ਵਿੱਚ 17ਵਾਂ ਸਥਾਨ ਹਾਸਲ ਕੀਤਾ। 

ਸਾਵਨ ਬਰਵਾਲ ਦੀ ਚਾਂਦੀ ਨਾਲ ਏਸ਼ੀਆਈ ਖੇਡਾਂ 2026 ਵਿੱਚ ਭਾਰਤ ਦੀ ਮੈਡਲ ਮੁਹਿੰਮ ਵਿੱਚ ਇੱਕ ਹੋਰ ਮਹੱਤਵਪੂਰਨ ਅਧਿਆਇ ਜੁੜ ਗਿਆ ਹੈ। 44 ਸਾਲ ਬਾਅਦ ਮੈਰਾਥਨ ਦੇ ਪੋਡਿਅਮ ’ਤੇ ਵਾਪਸੀ ਭਾਰਤੀ ਐਥਲੈਟਿਕਸ ਲਈ ਇੱਕ ਇਤਿਹਾਸਕ ਉਪਲਬਧੀ ਬਣ ਗਈ ਹੈ।

ਗੁਰਿੰਦਰਵੀਰ ਸਿੰਘ ਨੇ ਸ਼ੁੱਕਰਵਾਰ ਨੂੰ ਇੰਡੀਅਨ ਗ੍ਰਾਂ ਪ੍ਰੀ 1 (ਆਈਜੀਪੀ 1) 'ਚ 10.20 ਸੈਕਿੰਡ ਦੀ ਤੇਜ਼ ਦੌੜ ਨਾਲ ਪੁਰਸ਼ਾਂ ਦੀ 100 ਮੀਟਰ ਫਰਰਾਟਾ ਦੌੜ 'ਚ ਨਵਾਂ ਰਾਸ਼ਟਰੀ ਰਿਕਾਰਡ ਤੋੜ ਦਿੱਤਾ। ਰਿਲਾਇੰਸ ਦੀ ਅਗਵਾਈ ਕਰਨ ਵਾਲੇ 24 ਸਾਲਾ ਪੰਜਾਬ ਦੇ ਦੌੜਾਕ ਨੇ ਅਕਤੂਬਰ 2023 'ਚ ਮਣੀਕਾਂਤ ਹੋਬਲੀਧਰ ਵੱਲੋਂ ਬਣਾਏ ਗਏ 10.23 ਸਕਿੰਟ ਦੇ ਪੁਰਾਣੇ ਰਿਕਾਰਡ ਨੂੰ ਪਿੱਛੇ ਛੱਡ ਦਿੱਤਾ

ਦੇਖੋ ਵੀਡੀਓ ..